Demokraatit qinersinermi anguniagassatut pilersaarutaat – Inatsisartunut qinersineq 2021

Demokraatit partiitut pingaarnertut suliassaraat Nunatta sapinngisamik namminersorfiunissaa qulakkiissallugu. Kalaallit Nunaat inuttut kiffaanngissuseqarnermik imminullu akissussaaffeqarnermik pingaartitsiffiusoq. Kalaallit Nunaat immikkuullarissumik kultureqarnerminik ileqqoqarnerminillu puigugaqanngisaannartoq. Kalaallit Nunaat nunatsinni asaqisatsinni alianaatsorsuarmilu sulerusullutillu najugaqarusuttunut tamanut inissaqartitsisoq. Minnerunngitsumillu Kalaallit Nunaat immitsinnut iluamik pissusilersorfigisarput – allallu isumaannik isiginnittaasiinillu ataqqinniffiusoq.

Kikkulluunniit suleqatigisinnaavagut, naalakkersuisoqatigiilli ullumikkumut naleqqiullugu Nunatsinnik saamimmut saqisitsinerusut peqataaffigilernavianngilagut. Nunarput liberaliunerusoq kissaatigaarput, liberalimik eqqarsartaaseqarluni pissusiviusunut isiginnittaaseqarneq siuariartornerunermik, pigissaarnerunermik atugarissaarnerunermillu kinguneqartussaammat.

Tamatumunngalu akisussaaqataanerput qinigaaffimmi qaangiuttumi takutipparput. Ilaatigut ingerlatseqatigiiffinnut akileraarutip apparneqarnera, sulinermut ilanngaateqalernera aammalu Nuummi Ilulissanilu nutaanik mittarfissualiortoqarnissaa qulakkeerpagut.

Taamatullu liberalimik eqqarsartaaseqarneq qinigaaffimmi aggersumi ingerlaannassaaq. Tamatumani anguniassallutigu ingerlatseqatigiiffinnut akileraarutip appaqqinneqarnissaa, suliffeqarfiit nunanut allanut naleqqiullutik unammilleqatigiinnikkut pitsaanerusunik atugassaqaleqqullugit, suliffeqarfiillu taamaalillutik aningaasaatiminnik amerlanerusunik pigisaqaannaqqullugit, tamannalu siuariartornermik suliffinnillu pilersitsiffiussaaq.

Aamma innuttaasut nalinginnaasut qaammatit tamaasa aningaasaateqarnerulernissaat qulakkeerniarparput. Tamannalu akileraarutinik appaanikkut imaluunniit sulinermut ilanngaatip qaffaavigineratigut pisinnaavoq. Sorliussanersoq apeqqutaavallaanngilaq – pingaarnerpaarli tassaavoq innuttaasut namminneq aningaasarsiutigisaminnik amerlanerusunik pigisaqaannarsinnaanissaat.

Naatsumik oqaatigalugu Nunatsinni inuuniarneq, najugaqarneq suliffeqarfimmillu ingerlatsineq ajornannginnerullunilu akikinnerusariaqarpoq.

Taama oqareerluta nunarsuaq tamakkerlugu coronamik nappaalasoqarnerata sunniuteqarfigisaaniinnerput puigussanngilarput, tamanna aningaasaqarnitsinnut annertuunik killilersuimmat. Inuttut nappaalanersuaqarnera maannamut anigorluarparput, toqusoqarata tunillatsittullu ikittuinnaallutik. Iluatsitsilluarnerpullu taanna tulluusimaarutigisinnaavarput. Aningaasaqarnittali Coronamit ukiuni tullerni marlussunni sunnerneqarnissaa pinngitsoortissinnaanngilarput. Taamaammat atuivallaarnaveersaartariaqarpugut aningaasartuutissallu tamaasa isumaliutigeqqissaartariaqarlutigit.

Demokraatit suliassaqarfiit assigiinngitsut iluanni isumaat qinersinermi anguniagassatut pilersaarummi uani annertunerusumik paasisaqarfigisinnaavatit. Isummallu taakkuupput qinigaaffimmi aggersumi angujumallugit sulissutiginiakkagut.

Atuakkatit nuannarigukkit, taava Inatsisartunut apriilip arfernani qinersinermi Demokraatit qinikkit.

Qinersinissat pingaaruteqarpoq, taamaammat atornissaa eqqaamajuk.

Demokraatit qinigassanngortitaat sinnerlugit tamassi qinersilluarnissassinnik kissaappassi!

Inuss. inuull.
Jens-Frederik Nielsen
Siulittaasoq