QINEQQUSAARNERMI PROGRAMMI
Aalisarneq pillugu inatsit nutaaq aalisartunit inuiaqatigiillu sinnerinit iluaqutigineqassaaq
Aalisarneq inuussutissarsiutitta pingaarnersaralugulu iluanaarnarnersaraat. Aamma taamaaginnarnissaa kissaatiginarpoq. Taamaammat pingaaruteqarpoq aalisarnerup ineriartortittuarnissaa pisariillisarnerunissaalu, sapinngisamik annerpaamik aningaasarsiutigisinnaajumallugu. Tassungalu atatillugu erseqqissaatigisariaqarparput aalisarnermut politikki isumaginninnermut suliffissaqartitsiniarnermullu politikkimit avissaartinneqartariaqarmat. Assersuutigalugu aalisakkeriviit sumiiffinnut annertuumik suliffissaaleqiffiusunut, sumiiffimmi pineqartumi suliffissaqartitsinissaq tapersersorniarlugu inissiinissamik eqqarsartaaseqarneq qimattariaqarparput. Aalisakkeriviit sumiiffinni tunitsiveqarnermut avammullu nioqquteqarnissamut tunngatillugu naleqqunnerpaani inissinneqartassapput. Taamaaliornikkut aningaasanik iluanaaruteqarnerusinnaavugut, taakkulu atugarissaarnerup pitsanngorsarnissaanut imaluunniit akileraarutitigut oqilisaassinissamut atorneqarsinnaapput.
Aalisarneq pillugu inatsit nunatsinnut – akornutaanani – iluaqutaasoq pigissavarput. Aalisarneq pillugu ataatsimiititaliarsuup pilersinneqarnera qinigaaffimmi qaangiuttumi suleqataaffigaarput, taassumalu aalisarneq pillugu inatsisissamut nutaamut inassuteqaatissani ungasinngitsukkut saqqummiuttussaavai. Inassuteqaatillu taakku politikkikkut misissoqqissaarneqarnissaat aalisarnerlu pillugu inatsisissamut nuna tamakkerlugu naaperiutigineqarnissaanut tunngavigineqarnissaat pingaaruteqarpoq.
Demokraatinulli pingaaruteqarpoq naqissusissallugu aalisartut misilittagaasalu tusarnaarneqarnissaat pingaaruteqarluinnarmat. Aalisarneq pillugu inatsisissap piviusorsiortuunissaa pissusiviusunillu tunngaveqarnissaa pingaaruteqarluinnarpoq, pappiaratiguinnaq kusanartuutiinnarnagu. Taamaammat aalisartut aalisartullu kattuffii sukumiisumik tusarniaavigeqqaarnagit inatsit inaarutaasumik akuersissutigissanngilarput.
Tamatumunngalu peqatigitillugu pingaaruteqarpoq erseqqissaatigissallugu aalisarneq pillugu inatsisissaq tamanit 100 procentimik naammagisimaarneqarnavianngimmat. Aalisartut inuiaqatigiillu soqutigisaasa akornanni tulluartumik naaperiutigisariaqarparput. Tassungalu atatillugu Demokraatit erseqqissaatigissallugu pingaartippaat aalisartut aalisagaqassuseq pillugu ilisimasaat ataqqilluinnaratsigit. Tamanna aamma aalisartut qanoq pitsaasumik piujuartitsinissarlu tunngavigalugu aalisartoqarsinnaaneranut ilisimasaannut atuuppoq.
Aalisarneq pillugu inatsimmi nutaami pisasseeriaaseqarneq akitsuuseeriaaseqarnerlu aaqqissuunneqassapput inuiaqatigiinnut inuussutissarsiummullu iluaqutaasussanngorlugit. Aalisarneq inuussutissarsiutitut uatsinnut ima pingaaruteqartigivoq nunatta aningaasaqarnerata immeraassutiginissaanut atugassaani.
Aalisartortagut allanngorartuunngitsunik atugassaqartissavagut. Assersuutigalugu pisassiissutigineqartut utertinneqariataarsinnaannginneri qularnaveeqquserneqassaaq. Taamatummi qularnaveeqqusiisoqanngippat aningaaseriviit arlaannaalluunniit angallatinik nutaanik aalisarluarsinnaasunik aningaasalersuinermut millionerpassuarnik taarsigassarsititsinavianngilaq.
Ima iliorniarpugut
– Aalisarneq pillugu inatsisip nutaap, aalisartut inuiaqatigiillu soqutigisaannut iluaqutaasup akuersissutiginissaa ilungersuutiginiarparput.
– Pisassiissutit niuerutigineqarsinnaasut nammineq pigisat amerlanerusut aalisarnerup iluani eqqunneqartariaqarput. Tamanna pisariillisaataassaaq pingaartumillu aalisartut pikkorissut annertusaanissaannut periarfissiissalluni – taamatullu aamma inunnut ataasiakkaanut nunatsinnullu tamarmut aningaasatigut iluanaaruteqarnerulersitsissalluni.