-soorunami tamakkiisumik matussuserneqarluni
Demokraatit neriorsuinikuupput, kalaaliulluni akikinnerulissasoq. Taamaattumillu tamanna piviusunngortinniarlugu eqqarsaatigisimavarput.
Taamaattumik siunnersuutigaarput kalaallit tamarluinnangajammik atortagaasa eqqunneqarnerannut akitsuut peerneqassasoq. Kaffinut, tiinut neqinullu akitsuutit pineqarput. Akitsuutit taakku peernerisigut assersuutigalugu ima kinguneqarsinnaavoq:
-Kaffit akia kiilumut 6 koruuninik appassaaq
-Tiit akia kiilumut 6,60 koruuninik appassaaq
-Nersussuup neqaa aserortikkap akia 10 koruuninik appassaaq
Taamatut iliuuseqarnerup kalaallit tamaasa allanut atuinissaannut aningaasaqarnerulersissavai. Nunattali karsianut ukiumut 20 millionit koruuninik isertitakinnerunermik kinguneqassalluni. Taakkulu soorunami matussusertariaqarpagut. Taamaaliunngikkutta akisussaassuseqannginnerussammat politikkikkullu tatiginassanani.
Siunnersuut aningaasalersorneqassaaq nunatta karsiani ingerlatsinermut- aammalu tapiissuteqarnermut aningaasaliissutinit 1 procentimik sipaarnikkut 45 millioninit pissarsinikkut. Allatut oqaatigalugu allaffissornikkut sipaarniarnissamik anguniakkap aalajangiusimaneratigut – kisiannili ima ingerlallugu, allaffeqarfipput sipaarniarnermut piffissalerlugu, innuttaasut sullinneqarnerat ajoquseqqunagu.
Siunnersuutigisatta 25 millionit koruuninik aningaasalersorneqarnerusoq ersarippoq. Tassunga pissutaavoq, Inatsisartunngortussani amerlanerussuteqarsinnaannginnerput. Taamaattumillu aningaasalersornissaanut isumaqatiginninniarnissamut periarfissaqartariaqarpoq. Soorlu assersuutigalugu takorloorneqarsinnaavoq, peqqinnissaqarfik- aamma ilinniartitaaneq akileraarusersornagit ingerlatsinermut- aammalu tapiissuteqarnermut aningaasaliissutinit 1 procentimik sipaarniarnissamik siunnersuutip piviusunngortinneratigut. Imaluunniit takorloorneqarsinnaavoq aningaasat ilaasa sulinermut ilanngaatip qaffanneqarneranut atorneqarnissaat, taamaasillutik suliffillit tamarmik aningaasanik amerlanernik pissarsillutik. Allatut aamma iliortoqarsinnaassajunnarsivoq, politikkikkulli qanoq isumaqatigiittoqassanersoq naggataagut apeqqutaaginnassaaq.
Siunnersuutip tamakkiisumik matussuserneqarneratigut kinguneqassaaq, kalaaliulluni akikinnerulernera. Tamannalu pitsaasuuvoq.
Inussiarnersumik inuulluaqqusillunga
Jens-Frederik Nielsen
Demokraatit siulittaasuat
