All.: Bo Martinsen, Demokraatit sinnerlugit Inatsisartunut qinigassanngortittoq
Maanna qineqqusaarneq ingerlaleruttorpoq, tassani 31-ulluta Inatsisartuni inissinneqassalluta. Kisitsit taanna siunissami 21-mut appartinneqassasoq kissaatigaara. Nunatsinnut ajunngitsorpassuartigut tamanna sunniuteqassaaq. Innuttaasut 56.000-iuvugut ilumoorsinnaanngilarlu pinngitsoornani ilaasortat 31-ussasut. Inatsisartuni ilaasortatut suliassatigut nammatassat ilaasortanit 21-usunit nammanneqarsinnaakutsoorput.
Tamanna ukiumut minnerpaamik 10 mio. koruuninik sipaaruteqartitsissaaq, soorlu ilaasortanut akissarsiatigut sipaaruteqarneq, partiinut tapiissutitigut sipaaruteqarneq aammalu angalanermi najugaqarnermilu aningaasartuutit appariartorneritigut. Aningaasat sipaarutigineqartut pitsaanerujussuarmik atorneqarsinnaapput – assersuutigalugu utoqqaat atugassarisaannik pitsaanerulersitsilluni.
Ilumoorsinnaanngilaq uagut politikeriusugut ukiut tamarluinnaasa akitsuutit qaffanneqassanngitsut aammalu akileraarutit qaffanneqassanngitsut neriorsuutigiuaannassagipput kingunerisaanillu qineqqusaarnermi neriorsuuterpassuarnik oqalulluta taakkualu KIKKUNNUT TAMANUT millionerpassuarnik akeqarlutik, akiliisoqartussanngortorlu aaqqiissutissamut aqqut sukkanerpaaq ajornannginnerpaarlu toqqarneqartarpoq – akileraarutinik qaffaaneq imaluunniit akitsuutit nutaat. Akitsuutit akerleraakka, tassaaginnarpummi akileraarutit allatut taaguusiinnakkat.
Akitsuutit minnerpaaffissaaniitinneqarnissaat uanga ornigineruara. Uagut politikeriusugut takutitsilluarniarta inuiaqatigiillu aningaasaqarnikkut eqqugaareertigisut aningaasanik aallerfigipallaannarnagit ilutsinni misissueqqaartalernissarput ilikkarlugu.
Uanga qinikkatut una siuttuuffigissavara, tassa UAGUT – qinikkat – akiligassanik akiliisoqaleraangat siulliunneqartartussat. Ilutsinni sipaarniutissat nassaarisariaqarpagut siornatigut partiit tamarmik iliuuserisarsimasaattut iliornata – akiligassat innuttaasunut ingerlateqqillugit.
Innuttaasut siulliullutik politikerit qineqqusaaramik neriorsuutaannik akiliisuusarnerat uattulli qatsukkukku isumaqaruillu politikerit partiillu sipaarniartoqalernermi namminneq sallersaallutik inissisimasassasut, taava tamanna apriilip arfernani qinersileruit eqqaamagiuk.
Tamanna sallersaallunga sorsuutigissavara. Bo Martinsenimik ateqarpunga Demokraatillu sinnerlugit Inatsisartunut qinigassanngortillunga.
