QINEQQUSAARNERMI PROGRAMMI
Ilaqutariinnik siunnersortit ilaqutariinnik nukittunerusunik pilersitsissapput
Ilaqutariit tamaasa nukittorsarusuppagut. Ilaqutariit tamarmik unammilligassaqartarput unammilligassallu ima oqimaatsigilerlutik allaat angajoqqaat avissaartariaqalerlutik, meeraasalu inooqataanikkut annertunerusunik unammilligassaqalersinnissaat pinngitsoortinniassaralugulu pinaveersaartitassaraarput.
Angajoqqaat meeqqallu ilaasa avissaarsimallutik inuussagunik pitsaanerussasoq ataqqivarput, ilaqutariilli ingerlalluarnissaannut kikkut tamarmik iliuusissamikkut periarfissaqartinnissaat qulakkeertariaqarparput, meerartagut unammilligassat qanoq aaqqiissuteqarfiginissaannut oqimaaqatigiissumik isiginnittaaseqarlutik alliartorniassammata.
Ilaqutariinneq ataatsimoorfiit pigisatta nukittunersaraat qaninnerpaaffigisaralugillu. Inuunermi annikilliortilluta ilaqutariit qanittut nukimmik aallerfissaraagut. Ilaqutariit ulluinnarni asanninnermik, tapersersorneqarnermik isumassorneqarnermillu aallerfissaraagut. Aamma meerartatta isumassuinermik takutitsinissaq aamma imminnut allanullu akisussaaffeqarnissaq ilaqutariinni ilinniartussaavaat. Allatut oqaatigalugu ilaqutariit tassaapput inunnik nukittuunik nunatta siunissaata toqqammavigisassaanik pilersitsinissamut pingaaruteqarluinnartut.
Taamaammat ilaqutariit perorsaavittut toqqissisimaffigisatsitullu paarilluarnissaat pingaaruteqarluinnarpoq. Matumanilu ilaqutariit nalinginnaasuunerat, kattunneqarsimanerat imaluunniit allatorluinnaq inissisimanerat apeqqutaatinneqanngilaq.
Nuna tamakkerlugu ilaqutariinnik siunnersortinik pilersitsinissarput takorloorparput, ajortumut killinnginnermini ilaqutariinnik tamanik ikiuisinnaasunik. Aamma innuttaasut kikkulluunniit pinaveersaataasumik pulaarneqarnissaq siunertaralugu saaffigisinnaassavaat, unammilligassallu killiffigisimasatik qanoq iliorluni aaqqiissuteqarfiginissaannut siunnersorneqarsinnaassallutik sakkussanillu tunineqarlutik.
Ilaqutariinnik siunnersuisut angalaqatigiittartuunissaat eqqarsaataanngilaq. Eqqarsaatigineqartorli tassaavoq ilaqutariinnik siunnersuisut illoqarfinni nunaqarfinnilu tamani najugaqartuullutillu sulisarnissaat. Soorunami ilinniartinneqassapput pikkorissartinneqartarlutillu, illoqarfigisaminnili nunaqarfigisaminniluunniit najugaqassapput. Kullorsuaq assersuutigeriartigu. Tassani ilaqutariinnik siunnersuisoq assersuutigalugu Sisimiuneersuulluni Kullorsuarmiinngisaannarsimasuussanngilaq. Ilaqutariinnik siunnersuisoq illoqarfik nunaqarfilluunniit suliffigisassani attuumassuteqarfigisariaqarpaa.
Ilaqutariinnik siunnersuisut najukkami saqqumilaartuussapput, saaffigissallugit toqqisisimanarlunilu isumannaatsuuniassammat. Ilaqutariinnik siunnersuisoq taamaalilluni ilaqutariinnik pissarsiariuminartuussaaq pingaarnertullu siunertarissavaa ilaqutariit unammilligassaat pillugit siunnersuinissaq ilitsersuinissarlu, inuiaqatigiit ilaqutariinnik nukittuunik ataqatigiilluarnermillu toqqammavissaqartinniassagatsigit. Ilaqutariit unammilligassaminnik aaqqiissuteqarnissaat imminnullu inuiaqatigiinnullu nuannaarutaasumik najuinnarsinnaanngorlutik.
Siunnersuineq ilaqutariit angerlarsimaffiini pisassaaq.
Ima iliorniarpugut
– Nuna tamakkerlugu ilaqutariinnik siunnersortinik pilersitsiniarpugut.
– Ilaqutariinnut sullissiviit sumiiffinni ataasiakkaani suliaqarfiinik nalilersuillutalu ersarissaassaagut, taamaaliornikkut najukkani ilaqutariinnik siunnersortinik pisariaqartitsineq paasiumallugu tamatumunngalu pisariaqartitsineq erseqqissarneqarsinnaasunngorlugu. Neqeroorutit pioreersut pitsaasumik qulaajaaffigineqarnissaat pingaaruteqarpoq, nuna tamakkerlugu ilaqutariinnik siunnersortit sapinngisamik pitsaanerpaamik suliaqarnissaat qulakkeerniarlugu. Tamatumani aamma qulaajarneqassaaq ilaqutariinnik siunnersortitut sulissagaanni suliatigut suut pisariaqarnersut.
– Innuttaasut peqqissusaannik suliniutaasup INUUNERITTA III-p tamakkiisumik atuutilersinneqarnissaa qulakkeerneqassaaq.