QINEQQUSAARNERMI PROGRAMMI
Inuit kikkulluunniit sumi najugaqarusunnerminnut tunngavissaqartumik periarfissaqassapput
Pitsaasumik ilinniagaqarnissamut naammassinermilu pitsaasumik suliffeqalernissamut periarfissat inuit ataasiakkaat kissaatigisamisut sumi najugaqarnissaannut aalajangiisuusarput – illoqarfiunersoq nunaqarfiunersorluunniit apeqqutaatinnagu. Inuit ataasiakkaat tamanut ilaqutaasussamik inuunerminnut nammineerlutik akisussaalernissaannut sinaakkutissat qulakkeernissaat ineriartortinnissaallu uagut pingaartipparput.
Nunaqarfimmiuuneq illoqarfimmiuunerluunniit apeqqutaatinnagu suliffeqalernissamut periarfissaqarnissaq qitornallu atuarfimmi pitsaasumi pitsaasumik atuartinneqarnissaat pingaaruteqarpoq. Taamaammat pisortat assersuutigalugu inissialiortitsinissaannut imaluunniit pisortat sullissiviinik sanaartortitsinissamut innuttaasut amerlassusaat aalajangiisuussanngilaq. Taarsiullugu pisortat aningaasaataasa sumiiffinni siuariartortitsinissamut periarfissagissaarnerusuni atorneqarnissaat qulakkeertariaqarparput.
Illoqarfinnut nutserneq akiornagu tapersersussavarput. Illoqarfiit nunaqarfiillu, aamma nunaqarfiit Nuullu akerleriissinneqartarneri sammineqarpallaaqaaq. Nuna tamakkerlugu qanoq pitsaanerpaamik ineriartortitsisoqarsinnaaneranik ukkatarinninneq uterfigeqqikkusupparput. Allatut oqaatigalugu, immitsinnut akiuukkunnaarluta immitsinnut nukittorsaqatigiilluta suleqatigiittariaqarpugut.
Tassungalu atatillugu pingaaruteqarpoq pisortat inissiaataat attartortittakkat pitsaassuseqarnissaat najugaqarfigissallugit pilerinartuussallutik. Iluarsartuussinissamut kinguaattoorutit annertuupilussuupput, inissiallu arlalissuit najugaqarfissatut toqqaannartumik naleqquttuunatik.
Ima iliorniarpugut
– Kikkulluunniit inoqarfinni kissaatiginngisaminnik najugaqartinneqannginnissaat qulakkeerneqassaaq. Tamannalu qulakkeerneqassaaq kikkulluunniit suliffissatigut periarfissat pitsaanerusut pissutigalugit nuukkusuttut pisortanit tamatumunnga tapiiffigineqarsinnaanerisigut.
– Pisortat inissiaataasa attartortakkat nungullarsimasut qanoq iliornikkut iluarsartuunneqarsinnaanerinut tamakkiisumik pilersaarusiortoqassaaq, najukkami suliffissaqartitsiniarnermut pilersaarummut ataqatigiissillugu, taamaaliornikkut inuusuttut amerlanerusut assassorissatigut ilinniartutut suliassaqartilernissaat qulakkeerniarlugu.