QINEQQUSAARNERMI PROGRAMMI
Torersumik pissusilersornissaq ataqqeqatigiinnerlu pingaartitarineqassapput
#metoo naleqartitat pillugit oqallinnermik annertuumik pingaarutilimmillu aallartitsivoq. Kanngunarsaalluni pissusilersuutit akuerineqarsinnaanngilluinnarput, oqallinnerullu pingaarutillip sapiissuseqarluta peqataaffiginissaa pingaaruteqarpoq. Pisimasunik saqqummersut amerliartortillugit immitsinnut eqqortumik pissusilersornissarput pikkoriffigineruleriartussavarput.
Inuit inoqatiminnut timikkut, tarnikkut kinguaassiutitigullu persutaasartut suli naammattuugassaaneri naleqquttuunanilu ataqqinanngilluinnarpoq. Inuit taamaaliortartut ullumikkumut naleqqiullugu sakkortunerujussuarmik pillarneqartariaqarput. Tamanna aningaasatigut taarsiissuteqarnikkut pineqaatissinneqarnikkullu pisassaaq.
Tamanna aamma inunnut meeqqanik kanngunarsaasunut sumiginnaasunullu atuuppoq. Inuit taakku sakkortuumik erseqqissumillu pillarneqartariaqarput, aamma meeqqanut tunngasunik qaqugumulluunniit suliaqarsinnaajunnaarsinneqartariaqarput.
Kanngunarsaanerit nakkarsaanerillu ullumikkut toqqaannartumiinnaq pineq ajorput, aamma qarasaasiatigut annertuumik pisalersimapput, inuit attaveqaqatigiittarfii nakkarsaanermut inunnullu allanut ataqqinanngitsumik pissusilersornermut atorneqartalersimallutik. Immitsinnut isikkut qiviartariaqarpugut isumaqatigiissutigalugulu taamatut pissusilersortoqartarnera ingasappallaalersoq. Immitsinnut torersumik ataqqinnittumillu pissuseqartariaqarpugut, immitsinnut qanikkaluarutta imaluunniit qarasaasiap saaniikkutta.
Aamma ajoraluartumik kanngunarsaanerit atornerluinerillu ilarpassui – assersuutigalugu atisaqanngitsunik assilisanik akuersititseqqaarani ingerlatitseqqiisarnerit – inuit attaveqaqatigiittarfiini eqimattani annertuumik pisartut takusinnaavarput. Tamakku aamma akiorneqassapput pinerluttullu annertunerusumik pillagaasassapput pinerlisaminnullu taarsiissuteqartussanngortinneqarlutik.
Ima iliorniarpugut
– Inuit attaveqaqatigiittarfiini paasititsiniaanermik suliaqartoqarlunilu aallartisaasoqassaaq, attaveqaqatigiittarfinni taakkunani qanoq pissusilersornissaq qanorlu oqaloqatigiittoqartarnissaa immikkut sammineqassalluni.
– Pingaartumik arnat tujorminartunik kanngunarsaataasunillu misigisaqarsimanerminnik saqqummiussinissaminnut pitsaanerusunik periarfissaqarnissaat qulakkeerneqassaaq, kanngunarsaasullu akisussaatinneqassapput aningaasatigullu taarsiissuteqarnissamut periarfissat pitsanngorsarneqassallutik.
– Kinguaassiutitigut kannguttaatsuliornerit pillugit suliani pisoqalisoornissamut piffissap killinganut paragrafi atorunnaarsinneqassaaq, saqqummernissamut sapiissuseqalernissamut piumassuseqalernissamullu ukiorpassuit ingerlasinnaasarmata, aammalu kannguttaatsuliortut arlaannaataluunniit akisussaatinngitsoortinnissaat pinngitsoortinniarlugu.
– Kinguaassiutitigut kannguttaatsuliortut sakkortunerusumik pillarneqartarnissaat sulissutigineqassaaq, pingaartumik meeqqanut kannguttaatsuliornerit pineqartillugit.
– Inuttut pisinnaatitaaffiit pillugit suliniuteqarneq torersumik pissusilersornissaq ataqqeqatigiinnissarlu ukkataralugit nalilersuiffigeqqinneqassaaq.
– Naligiissitaaneq pillugu inatsit nalilersoqqinneqassaaq assigiinngisitsisarnerlu akiorniarlugu inatsisiliortoqarnissaanut aqqutissiuussisoqassaaq.