QINEQQUSAARNERMI PROGRAMMI
Mittarfiit amerlanerusut – siuariartorneq annertunerusoq
Nuummi Ilulissanilu mittarfissuit sanaartorneqarnerisa aallartinneqarsimanerat takusinnaallugu tulluusimaarutigaarput. Suliniutinut taakkununnga marlunnut akisussaaffik tamarmiusoq tigusinnaakutsoorparput, nunarput tamakkerlugu siuariartortitsinissaat atugarissaarnerulersitsinissaallu naatsorsuutigigatsigu. Matumanilu maluginiagassaavoq suliniutit taakku marluk Siumup, Nunatta Qitornaasa Demokraatillu akornanni suleqatigiinneq kisiat pissutigalugu piviusunngortinneqarmata. IA-p Partii Naleqqallu suliniutit taakku pinngitsoortinnissaat ilungersuutigisimavaat, tamannalu partiit siuariartortitserusuttut aalajangiinissamullu sapiissuseqartut, partiillu kigaallassaaniartuartut aalajangiinissamullu sapiissuseqanngitsut assigiinngissutaannik ersersitsilluarpoq.
Nuna namminiilivinnissamut ingerlaartoq partiinik politikerinillu sapiitsunik aalajangiinissaminnullu sapiissuseqartunik pisariaqartitsivoq. Taamaattoqanngippat ingerlariaqqinnavianngilagut.
Attaveqaasersuutitigulli aningaasalersuinerit tassunga killinnavianngillat. Qaqortumi nunap immikkoortuani mittarfissap sanaartorneqarnerata aallartinnissaa qilanaarivarput. Qaqortumi mittarfeqalernera Kujataa tamakkerlugu siuariartornermut ineriartornermullu aallartisaataassaaq, tamannalu nunap immikkoortuanut pissusissamisoorpoq.
Tamatuma saniatigut Tasiilami Ittoqqortoormiinilu mittarfissanut marlunnut qinigaaffimmi aggersumi nivariaqqaartoqarnissaa ilungersuutiginiarparput. Sumiiffinni taakkunani marlunni mittarfiliornissaq inuiaqatigiinnut iluaqutissartaqassasoq nalunngilarput, taamaattumillu aallartisarnissaat pillugu aalajangernissamut sapiissuseqarnissaq pineqaannarpoq. Demokraatini uppernarsareerparput aalajangiinissamut qununata – aamma tamanna takuteqqissavarput.
Ima iliorniarpugut
– Ilulissani, Nuummi Qaqortumilu mittarfiliortiternermik suliniutit aallartisarneqartut arlaannilluunniit – uterlugu arlaannilluunniit – unitsinniarneqannginnissaat qulakkiissavarput.
– Tasiilami Ittoqqortoormiinilu nunap immikkoortuini mittarfissat qulakkeernissaannut suliassaq pisariaqartoq aallartissavarput.