QINEQQUSAARNERMI PROGRAMMI
Nukissiuutinik ataavartunik atuileriartorneq pingaaruteqarpoq pisariaqarlunilu
Inuit silap pissusianik allannguisimanerat nunatsinni ersarittupilussuuvoq, inooriaasitsinnullu aamma sunniuteqarpoq. Taamaammat sapinngisamik avatangiisinut mingutsitsinngitsumik silallu pissusianut mianerinnittumik inooriaaseqarnissarput pissusissamisoortumik soqutigisaraarput.
Ingiinnarluta nammineerluni qaangiutissasoralugu utaqqiinnarnissaa iluaqutissartaqanngilaq. Ajornartorsiutit pimoorulluinnartariaqarpagut, aamma iliuuseqartariaqarpugut. Tamannalu uatsinnut aalajangiisartunut, suliffeqarfinnut ataasiakkaanut innuttaasunullu ataasiakkaanut atuuppoq. Demokraatinit upperaarput ineriartorneq mumisinneqarsinnaasoq. Tamattali ataatsimoorluta iliuuseqarnissatsinnik siunniussaqarnissarput pisariaqarpoq.
Tulluusimaarutigisinnaavarpullu ullumikkut nukissiornitta ilarujussua erngup nukinga atorlugu pilersitarigatsigu, aamma innuttaasut atortorissaarutinik avatangiisinut mianerinnittunik ikkussuinissaannut tapiissuteqartarpugut, soorlu seqernup nukinganik innaallagissiuutinut. Taakkuli naammanngillat. Nukissiuutinik ataavartunik atuinerusariaqarpugut, soorlu assersuutigalugu erngup anorillu nukingi atorlugit. Nukissiuutinik ataavartunik atuilernissaq nunarsuaq tamakkerlugu siunniuteqqaneqarpoq, nunatsinnilu aamma tamanna pikkoriffiginerulertariaqarparput, naak aallartilluareeraluarluta.
Taamaakkaluartoq politikkimik ataqatigiissumik assigiissumillu, silap pissusianut pitsanngorsaataasussamik nukissiuutinillu ataavartunik atuileriartornissamik ukkatarinneqqissaartumik suli pilersitsisinnaasimanngilagut.
Ima iliorniarpugut
– Nukissiuutit ataavartut atorlugit, soorlu imeq, anori seqinerlu atorlugit nukimmik annertunerusumik tunisassiornissamut periarfissat misissorneqassapput.
– Demokraatit siunnersuuteqarnerisigut immikkut ilisimasalinnik suleqatigiissitaliortoqarpoq nukissiuutinik ataavartunik avatangiisinullu mianerinnittumik atuileriartornerup siuarsarnissaanut politikkikkut qanoq iliortoqarsinnaaneranik siunnersuuteqartussamik. Immikkut ilisimasalinnik suleqatigiissitat qinersinerup kingorna suliaminnik nangitsinissaat qulakkiissavarput.
– Plastikkinik eqqussuineq annikillisikkiartortinneqassaaq
– Suliffeqarfiit innuttaasullu atoqqiineq pillugu ilisimasaqarnerulersinneqassapput.