QINEQQUSAARNERMI PROGRAMMI
Pisortat ingerlataannik annikillisaasoqassaaq
Pisortat ingerlataanni allaffissornermik suliallit ukiorpassuit ingerlanerini amerliartuinnarsimapput. Demokraatit tamanna unitsikkusuppaat. Allaffissornermik suliallit amerlassusaat ukiuni tulliuttuni minnerpaamik ukiumut procentimik ataatsimik ikiliartortinneqassapput. Kigaatsumik naleqqussaaneruvoq IT-mik pisariillisaanernillu allanik eqqussinissamut inissaqartitsisussaq.
Namminersorlutik Oqartussat allaffissornerisa ukiut sisamat ingerlanerini 25 millionit koruunit nalinginik annikillisarneqarnissaanik kissaateqarneq Demokraatit aningaasanut inatsimmi kingullermi ilanngutsippaat. Nassuerutigisariaqarparput innuttaasunut 55.000-inut allaffissortugut amerlavallaarujussuarmata, aamma sulisinnaasut amerlavallaarujussuartut pisortani sulisorineqarput ikittuinnaallu namminersortunut sinnerullutik. Demokraatinik qinersineq pisortani pisariillisaanissap ingerlanneqarnissaanut qinersinerussaaq. Ajornartorsiutip oqaluuseriinnarnera naammanngilaq – tigussaasumik iliuuseqartariaqarpugut.
Tamatuma kingorna allaffissornermik aaqqissuusseqqissaagut pisortat ingerlataanni tamani annikillisaanissaq pisariillisaanissarlu immikkut siunertaralugu. Tamanna ilaatigut teknikkikkut atortorissaarutinik nutaanik atuinikkut pissaaq. Tamatumali ataqqinnittumik eqqarsaatigilluakkamillu ingerlanneqarnissaa pingaaruteqarpoq. Pisortat innuttaasunik sullissinerat ullumikkornit ajornerulissanngilaq.
Ima iliorniarpugut
– Namminersorlutik Oqartussanit, kommunit, oqaaseqartartut suliniaqatigiiffiinit sulisullu kattuffiinit peqataaffigineqartumik suleqatigiissitaliorniarpugut pitsaassuseq pillugu aaqqissuusseqqinnissaq siunertaralugu, suleqatigiissitarlu pisortat sullissinerannik aningaasat atorneqartartut nikisinnagit qanoq annertusaasoqarsinnaaneranut siunnersuuteqassaaq.
– Pisortat allaffissorneranni ukiumut minnerpaamik 1 procentimik annikillisaasoqassaaq (allaffissornermik suliallit)
– Pisortat ingerlataannik tamarmiusunik aaqqissuusseqqinnissamut pisariaqartumik alloriartoqassaaq.
– IT/oqarasuaatit/Internetti/Appit aqqutigalugit nammineerluni sullissinernut aaqqiissutinik amerlanerusunik eqqussinissamut aqqutissiuisoqassaaq, inunnut ataasiakkaanut kiffaanngissusermik akisussaaffimmillu aamma tunniussisussanik.