QINEQQUSAARNERMI PROGRAMMI
Isumaginninnerup iluani nutaamik eqqarsarnikkut innuttaasut nukittunerusut pilersinneqassapput
Nunatsinni isumaginninnikkut ajornartorsiutit ajoraluartumik suli amerlapput. Meeqqat sumiginnagaasartut amerlavallaarput, imminnut naleqartinngippallaartut amerlavallaarput imminullu toquttartut amerlavallaarlutik. Tamakku ajornartorsiutigalugit nassuerutigisinnaasariaqarparput iliuuseqarfiginissaannullu sapiissuseqartariaqarpugut.
Siullertullu qulakkeertariaqarparput ikioqquneqarnissap ajunngilluinnartuunera tamanit ilisimaneqassasoq. Ajugaqanngitsut oqaluttuaniinnaq nassaassaapput – tamattalu ilaannikkut ikiorneqarnissatsinnik pisariaqartitsisarpugut. Matumanilu pingaaruteqarpoq ikioqquneqarnissatsinnut tunuarsimaannginnissarput. Ilaquttat ikinngutilluunniit ikiortiserineqarsinnaapput, aammali oqartussat ikiortissarsiorfigineqarsinnaapput.
Pisariaqartitsinerpaanik ikiuinissarput pikkoriffiginerulertariaqarparput, tassalu meeqqat. Amerlavallaartut sumiginnaasoqarnera isiginngitsuusaartarpaat, ilaqutartik ikinngutigilluagartilluunniit ajuallatsikkumanagu. Matumanilu eqqaamassavarput meeqqap kialluunniit pitsaasumik peroriartornissaa tamatigut ukkatarisariaqaratsigu. Tamatta pisussaaffigaarput angajoqqaatut pisussaaffimminnik paarsinerluttut nalunaarutigissallugit. Tamannalu sullissisunut soorlu ilinniartitsisunut perorsaasunullu annertunerusumik atuutsinneqarpoq. Taakkumi sumiginnaasoqarneranik minnerpaamilluunniit pasitsaassaqarunik erngerlutik iliuuseqartussaapput. Allatut pisoqanngippat tamanna atorfimmi kukkuluttornerussaaq annertooq.
Meeqqanik sumiginnaasarneq danskit naalagaaffiat suleqatigalugu akiorniarlugu toqqarsimavarput. Tassungalu atatillugu pisussaaffigaarput qulakkiissallugu sumiginnaanerup unitsinnissaanut pisariaqartunik sulisoqarnissarput. Tamanna aamma pisortat sumiginnaanerannut atuuppoq. Tamatumanilu politikeritut pingaarutilimmik akisussaaffeqarpugut, tassalu suliaqarfimmi inunnik isumalluutigineqarsinnaasunik sulisussaqarnissaata qulakkeernissaata politikkikkut eqqumaffiginissaa. Meeraq KINALUUNNIIT pisortanit sumiginnarneqartussaanngilaq.
Isumaqarpugut isumaginninneq tamaat isigalugu aallaqqaataaneeqqinneqartariaqartoq. Isumaginninnikkummi inunnik ataasiakkaanik qanoq ikiuisoqarsinnaanera ajornartoornerillu isumaginninnikkut qanoq unitsinneqarsinnaanersut akiorneqarsinnaanersullu ullumikkut ukkatarineqarpoq. Taama eqqarsartaaseqarneq Demokraatit mumisikkusuppaat aaqqissuussinermullu nutaamut pitsaanerusumullu sinaakkutissanik pilersitsillutik, innuttaasut isumaginninnikkut ikiorneqarnissaq periarfissat kingullersaattut isigilerlugu namminerlu ilaquttamilu pitsaasumik inuuneqarnissaat nammineq akisussaaffigalugu. Sumiginnaasarnerit pinaveersaartinnerisigut, ilinniagaqarnissap pingaartinneratigut innuttaasullu sulilernissamut kajuminnerulersinnerisigut peqatigiilluta ineriartornermik pisortat karsiinut isumalluuteqarnermik annikillisitsisinnaavugut, inuttullu ataasiakkaatut nukittuutut inuiaqatigiit tamanut pitsaanerusut pilersissinnaanngussavagut. Taama eqqarsartaaseqarnikkut inuit pisuussutiginngisaminnik annertuunik unammilligassaqartut ikiorsernissaannut aningaasat amerlanerusut pigilissavagut.
Ima iliorniarpugut
– Meeqqat sumiginnarneqartut paasineqarnissaat ikiorserneqarnissaallu qulakkeerniarparput. Atuarfinni inuit isumalluutigineqarsinnaasut paaqqinnittarfinnilu perorsaasut meeqqamik sumiginnarneqartumik paasisaqaraangamik iliuuseqarnissaminnut pitsaanerusunik sakkussaqartariaqarput.
– Nuna tamakkerlugu ilaqutariinnik siunnersortinik pilersitsiniarpugut.
– Imminut toquttarnermik pinaveersaartitsinermut periusissap erseqqissarnissaanik atulersinneqarnissaanillu suliaq ingerlateqqissavarput.
– Sulinerup pisortaniillu ikiorsiissutinik pisartagaqarnerup assigiinngissuteqarnerunissaat qulakkiissavarput. Sulineq tamatigut akilersinnaasariaqarpoq.
– Peqqinnissaqarfiup kommunillu akornanni suleqatigiinnerup nukittorsarnissaa qulakkiissavarput. Tarnip nappaataanut meeraaqqanullu suliaqarfik pitsanngorsaavigineqassaaq, taamaaliornikkut meeqqat paaqqutarineqarnissamut suliaritinnissamullu innersuunneqartartut nakkutigineqartarnerinik suliap ataqatigiittuarnissaa qulakkeerniassagatsigu.