Kingumunaasit Siumut saqqummeqqippoq pisortat suliffeqarfiutai Nuummiit avataanut nussorneqarnissaannik pilersaaruteqarluni. Pisortat suliffeqarfiisa pioreersut avammut nuunneqarnissaannik pilersaarutit tamaasa unitsinniartigit, akerlianilli uatsinnut neriorsoqatigiilluta siunissami pisortat suliffeqarfiit pilersitassaasa sineriammut nutsernissaannik. Tamanna inuppalaarnerussaaq aningaasatigullu akisussaassuseqarnerulluni.
Siumup tungaaniit nassuernerinnartut ippoq, Erik Jensen-ip nalunaarutigimmagu, pisortat suliffeqarfiutaat Nuummiit avammut nussorneqassasut. Siumup siulittaasua malillugu aallaaviginiarneqarpoq nalunaarusiaq nutaanngitsoq paatsoorneqarsinnaasumik atserneqarsimasoq ”Naligiimmik siunissaqarneq”, tassani siunertarineqarsimalluni, suliffeqarfiit 600-t Nuummiit nuunneqassasut. Taamani nalunaarusiaq saqqummermat amerlanerit takusinnaavaat nalaatsornerinnarmik siunnersuuteqarneq isumaqanngitsoq soorlu assersuutigalugu inatsisinik annertuumik suliaqartoq Ombudsmandeqarfik Nanortalimmut nuunneqassasoq. Nalunaarusiaq nipaatsumik taamaatinneqarpoq, maannali Siumup siulittaasuanit qaqeqqinneqarluni.
Nalunaarusiaq 2016-mi saqqummermat, kukkunersiuisut BDO attuumassuteqanngitsumik pisortatigoortumillu pisortatigoortumik paasiniaaqqissaarpoq taamani Siumut-borgmesteriutitaasa nalunaarusiaat. Inernera paatsugassaanngilaq akuersinngitsuullunilu. Nalunaarusiami sinerissamut nussuinissamik pilersaarutit piviusunngortinneqassappata minnerpaamik inuiaqatigiinnut 500 million koruuninit ukiut sisamat ingerlanerini akeqassaaq, annerpaartaasalu maannakkut sulisui nuukkumanngimmata, aap, maannakkut suliffeqarfinni ilisimasanik annaaneqassapput. Ila annertoorujussuit annaaneqassapput.
Naatsorsuisimaneq minnaarneqarsimagaluartoq, tassami nutaanik atorfinitsitsinissanut aningaasartuutit ilanngunneqarsimanngimmata. Taamatuttaaq angalanerulernernut naatsorsuutigineqartunut aningaasartuutit ilanngunneqarsimanatik, suliffeqarfiit sineriammut nuunnerisigut.
Taamani Siumup siunnersuutaa aammalu maanna isornartorsiornertaqanngitsumik 1-1 kopeerinerulluni qallunaat nunaanni nutsiterinermut pilersaarutinut, tunngaviatigullu mianersortuartariaqarpoq nunat allat politikkiat tiguinnassallugu isumassarsiaallu isumaqarluni, maani nunami atorneqarsinnaasut.
Imatut paasineqassanngilaq, Demokraatit sineriammi ineriartortitserusunngitsutut. Killormuanik isumaqarpugut. Isumaqaannartugununa kukkunerusoq, inuit piumanngitsut nutsertinnissaat. Taamaattumik pitsaanermik eqqarsartariaqarpugut. Suliffiit pioreersut nuunnagit, pitsaanerujussuussaaq imatut pigaanni, suliffeqarfiit pisortanit pigineqartut siunissami pilersinneqartut illoqarfinnut Nuup avataaniittunut inissippata. Taamaaliornikkut innuttaasut ilisimassavaat, qanoriliussanerlutik, suliffissaminnik qinnuteqarnerminni. Tassunga atatillugu eqqaamasariaqarparput, KANUKOKA-p nuunneranit kingunipilui. KANUKOKA Nuummit Maniitsumut nuunneqarmat sulisut arlaannaalluunnit, nooqataanissaminut kissaateqarsimanngilaq.
Siumut Kommuneqarfik Sermersuumi borgmesterissanut sassartitaa qanoq isumaqarpa?
Demokraatit Siumup Kommuneqarfik Sermersuumi borgmesterissatut sassartitaata, Inga Dora Markussenip isumaa paaserusuppaa, partiimi siammarterinermut politikkia isumaqatigineraa? Isumaqataappat, pisortat suliffeqarfiutaat suut aammalu nunap illoqarfittut pingaarnersaani akileraarutinut isertitassarpassuit sumut nuunneqassappat?
Akissutissaq pissanganaq, tassami Inga Dora Markussen partiiminit borgmesterituinnaq sassartussaanngimmat – qanittumimi Siumumi pissaanertaqaqisumik suliuttaasup tulliatut qinerneqarmat, taamaattumillu – pissusissamisoorpoq – naatsorsuutigissallugu, siunnersuummik isumaqatiginninnissaa. Mumiganilli aamma paasinarpoq, Kommuneqarfik Sermersuumi kommunalbestyrelsimut qinersinermi Siumumut taasinermi suliffeqarfiit pitsaasut taamatullu akileraarutitigut isertitat annaanissaannut taasinerussammat.
Taakku saniatigut soqutiginassaaq tusassallugu Siumup aqutsisuisa nassuiaataat, avammut nutsitserinissamik siunnersuut qanoq aningaasalersorniarneqarnersoq? Piviusunngortitsineq ilisimaneqartutut isertitassaagaluanik minnerpaamik milliartit affaanik annaasaqaataassammat.
Tungitsinniit isigalugu ajornaatsuuvoq: Siumup-siunnersuutaa kinguneqassaaq, pisortat allaffeqarfiata akisunerulernera, soorunalumi tassunga Demokraatit isumaqataanngillat. Inuiaqatigiit isertitassanik nutaanik suliffeqarfinnillu nutaanik pisariaqartitsipput – imaanngitsoq aningaasartuutit nutaat, ineriartuutaanngitsut.
Soorlu oqareersugut: Suliffeqarfiit nussorneri pisuunnguutigiunnanngilagut, inuiaqatigiilli pigissaarnerisa qaffatsinneratigut namminersortut inuussutissarsiutaasa annertusarnerisigut. Taamaattumik Demokraatit sulissutigiuassavaat namminersortut atugarisaasa pitsanngorsartuarnissaat. Maannamut taamaaliorpugut mittarfissarsuit tapersersornerisigut, ingerlatsiviit isertitaminnik akileraarutaasa appartinnerisigut aammalu suliffeqarnermut ilanngaammik pilersitsinikkut. Ineriartuutaasumik iliuutsit taamaattut ingerlatiinnassavagut.
Apersorneqassaguma paasissutissanillu annertunerusunik perusuttoqarpat attaveqarfigineqarsinnaavunga 58 06 91.
Inussiarnersumik inuulluaqqusillunga
Jens-Frederik Nielsen
Demokraatit siulittaasuat
