QINEQQUSAARNERMI PROGRAMMI
Namminersorlutik inuussutissarsiuteqartut nukittuut nunarput pisuujunerulersippaat
Demokraatit ukiorpassuarni sorsuutigereerlugu ingerlatseqatigiiffinnut akileraarutip apparneqarnissaa pillugu amerlanerussuteqalersitsinissaq qinigaaffimmi qaangiuteqqammersumi kiisami iluatsippaat. Tamanna soorunami nuannaarutigeqaarput, aqqutitsinnili alloriarnertut siullertuinnaq isigaarput. Ingerlatseqatigiiffinnut akileraarut appaqqinneqassaaq, nunani allani ingerlatseqatigiiffinnut akileraarutaasunut naleqqiullugu aatsaat iluamik unammillersinnaassuseqalersillugu.
Namminersorlutik inuussutissarsiuteqartut tassaapput naalakkersuinikkut namminiilivinnissap piviusorsiortumik oqaluuserineqalersinnaaneranut aningaasaqarnermik qulakkeerinnittussat. Qujanartumillu namminersorlutik inuussutissarsiuteqartut siuariartornissaannut inerititaqarfiunissaannullu sinaakkutissat pilersinnissaannut pinngortitarsuup tunngavissaqartilluarpaatigut.
Imartavut aalisakkanik qalerualinnillu peqarluarput, aatsitassaateqarpugut nunap iluaniittunik pinngortitarsuarlu immikkuullarissoq nallernissaqanngitsorlu pigaarput. Pinngortitap tunissutai taakku aalisarnerup, aatsitassarsiornerup takornariartitsinerullu iluani aningaasarsiorluarnissatsinnut periarfissaqartippaatigut. Suliaqarfinnullu taakkununnga pingasunut atugassarititaasut pitsaanerusut pilersitsikkutsigit nunatta tamarmi nukittunerusumik inissisimalissutigissavaa. Iluatsitsilluarnerlu iluatsitsilluarnermik pilersitseqqittarmat, aalisarnermik inuussutissarsiuteqarneq nukittooq, takornariartitsinermik inuussutissarsiuteqarneq nukittooq aatsitassarsiornermillu inuussutissarsiuteqarneq nukittooq suliaqarfinni allani suliffinnik siuariartornermillu pilersitsissapput. Tamanna Kalaallit Nunaannik nukittunerulersitsissaaq namminiilivinnissamullu tamatsinnit kissaatigineqartumut tunngavisseeqataalluni.
Inuussutissarsiutinut aalisarneq, takornariartitsineq aatsitassarsiornerlu assigalugit aningaasaqarnikkut atugarissaarnissatsinnut pingaaruteqarluinnartut patajaatsunik pitsaasunillu atugassaqartinnissaat qulakkiissavarput. Inuussutissarsiortut nukittuut nuna tamaat pisuujunerulersissavaat, taamaattumillu aamma siunissami namminiilivinnissamut tamatsinnit kissaatigineqartumut tunngavissaallutik pingaaruteqarluinnartut.
Pisortat suliassaasa pingaarnersaraat aaqqissuussinerni assigiinngitsuni inuiaqatigiinni nutaaliornissamut isumassarsiarpassuarnullu iluaqutaasussamik sinaakkutissaqartitsinissaq, allaffissornikkut malittarisassanik sunik tamanik pisariaqanngitsunik killilersornagit. Suliffeqarfiit namminersortut niuernikkut suliaqarfigisamik ukkatarinissaannut kiffaanngissuseqarnerussapput, ineriartortuarnermikkut nutaaliornermikkullu suliffinnik amerlanerusunik siuariartornermillu pilersitsisinnaanngortillugit, taamatullu aamma atugarissaarnerulersitsillutik.
Matumanilu Demokraatit pingaaruteqarluinnartutut isigaarput inuiaqatigiittut aallarnisaanermik ikorfartuinissamut nukinnik annertuumik atuinissarput. Aallarnisaasut nutaaliorsinnaallutillu pitsaasunik isumassarsiaqartut amerlanerusut pisariaqartippagut. Isumassarsiarmi pitsaasoq suliffeqarfimmut ingerlalluartumut aallarniutaasinnaavoq, siuariartornermik suliffissanillu pilersitsinikkut inuiaqatigiinnut tamanut iluaqutaasoq. Eqiasuissuseqarnissamik ilungersorlunilu sulinissamik piumasaqaatitaqarpoq, aammali ilikkagaqarfiulluarpoq inuttullu ilinniarfiulluni, tamannalu inummut nukittorsaataaginnartussaavoq. Kikkut tamarmik atuagarsornissaminnut ilinniakkanillu nalinginnaanerusunik ingerlatsinissaminnut naleqquttuunngillat. Uagulli isumaqarpugut inuk kinaluunniit pitsaasunik isumassarsisinnaasoq ilungersorlunilu sulinermigut nutaanillu sammisaqarusussuseqarnermigut nutaaliornissamillu eqqarsarnermigut inuussutigisinnaasaminik pilersitsisinnaasoq imminut naleqquttumik. Taamaammat aallartisaaneq ukkatarinerusariaqarparput aammalu inuit amerlanerusut piginnaasaqarnerminnik upperisaqarnerunissaat isumassarsiaminnillu piviusunngortitsinissaminnut sapiissuseqarnissaat sulissutigisariaqarparput.
Inuussutissarsiortut Nunatsinni aningaasaleerusussuseqarnissaannut tunngavissat pingaarnerit ilagaat aningaasaliisartut aningaasaliissutiminnik maangaannartitsinnginnissaannut qularnaveeqqusersinnaaneri. Tassa aalajangersimasunik qularnaatsunillu sinaakkutissaqartissavagut, aamma politikkikkut sammiviit allanngorartut malillugit allanngorteqattaartassanngilagut. Soorlu assersuutigalugu:
Aatsitassanut politikki allanngoranngitsoq tatiginartorlu ingerlatissavarput, Kalaallit Nunaata piffissaq ungasinnerusoq eqqarsaatigalugu aningaasaliiffigissallugu isumannaatsuunera tatiginartuuneralu aningaasaliisartunut takutinniarlugu. Tamaannaannarlu pissutigalugu pingaaruteqarpoq qinigaaffimmi uani misissuinissamut akuersissutinik, piiaanissamut akuersissutinik suliniutissallu pillugit tusarniaanernik aallartisaarnissamut eqeersimaartuunitsinnut. Demokraatit ernumalernavianngillat. Aatsitassarsiornermik suliniut peqqissutsimut avatangiisinullu akornutaasussaanngitsutut nalilerneqarpat, taava suliniutaasoq aallartinnissaminut akuerineqassaaq. Naalakkersuisoqatigiit nalornissutigineqartut annilaangassutigineqarneri tunngavigalugit pingaarutilinnik aalajangiinissamut sapiissuseqanngitsut peqataaffiginavianngilagut.
Ima iliorniarpugut
– Ingerlatseqatigiiffinnut akileraarut 20 procentinut apparniarparput
– Inuussutissarsiortunut toqqaannanngikkaluartumik ikiorsiissutaasartut annertussusaannik qulaajaaffiusussamik misissueqqissaarisoqassaaq, taakku toqqaannartumik tapiissutinngortillugit allanngortinneqarnissaat imaluunniit piivissorneqarnissaat siunertaralugu.
– Inuussutissarsiuteqartunut tapiissutaasartut suulluunniit piffissami killigaanissaat qulakkeerniarparput, suliffeqarfiit pisortanit tapiissutaannarnit isumalluuteqarlutik ingerlannginniassammata.
– Nunatsinneersut takornariartitsinermik suliffissuaqarnermi ingerlatsisinnaanerisa pilerinarnerulersinnissaa qulakkeerneqassaaq.
– Aallarnisaaneq meeqqanut inuusuttunullu meeqqat atuarfianni aallartittumik ilisarititsissutigineqassaaq.
– Aallarnisaasutsinnut siunnersuisarnerput Innovation Greenland aqqutigalugu nukittorsarneqassaaq.