All.: Bo Martinsen, Demokraatit sinnerlugit Inatsisartunut qinigassanngortittoq

Soraarnerussutisialinnut atugassarititaasut pitsaanerit anguniarusuppakka.

Uannut pingaaruteqarpoq uagut inuiaqatigiittut ataatsimoorluta utoqqartagut inuiaqatigiittut atugarissaarnissarput anguniarlugu inuunertik tamaat ilungersorlutik sulereersimasut isumagilluassagigut.

Inuit taakku soraarninngornikuullutik iluamik inuuneqarsinnaatitaasariaqarput, ulluinnarni atukkatigut soorlu inimut akiliutissanut, kiassarnermut, innaallagissamut nerisassanullu akissaqassanerlutik isumakuluuteqartariaqarnatik.

Eqqarsarluarnissarput tassani pingaaruteqarpoq. Soraarnerussutisiani tunngaviusumik aningaasat qaffaannassagutsigit taava imaanngilaq tassa eqqortumik iliortugut. Assersuutigalugu soraarnerussutisiallit aningaasaateqarnerulerpallaanngitsoorsinnaapput, tassami isertitat annertusinerat ineqarnermut tapiissutinut allanulluunniit tapiissuteqartitsinernut naatsorsuinermut ilanngunneqartalertussaavoq.

Iliuusissamik nassaarusuppunga tassani soraarnerussutisiallit tamarmik qaammatit tamaasa aningaasaateqarnerulernissaat qulakkeerneqassalluni. Inatsisinik allanik allannguisariaqassagutta taava tassa taamaaliortariaqarpugut.

Uagut politikeritut akisussaaffigaarput utoqqartatsinnut sinaakkutissanik pappiaqqatigut kusanaannartuniunngitsoq pilersitsinissarput, kisiannili aamma silarsuarmi piviusumi inuunerissaarnerunissamik pilersitsisinnaasunik.