QINEQQUSAARNERMI PROGRAMMI
Ilinniartitaaneq qularnaatsumik isertitaqalernissamut aqqutissaavoq
Kalaallit Nunaat namminersortoq aallarnerneqassaaq meerartatta ilinniartitaanermik pitsaanerusumik tuninerisigut. Ilinniartitaaneq inuiaqatigiinnut atugarissaarfiusunut toqqammaviuvoq, siunissamilu naalagaaffimmik namminersortumik ilusilersuinissatsinnut pingaarutilimmik inissisimalluni. Meerartatta ilinniartitaanerat nukittorsassavarput, tamatumanilu atuarfiit pitsaanerusut ilinniartitsisullu pitsaanerusut pisariaqarput. Atuarfinni inissatigut suliatigullu atugassarititaasut pitsaappata, taava atuartut piginnaanngorsarnissaminnut pitsaanerpaanik tunngavissaqartinneqassapput, taamaalillutillu aamma sulilernissaminnut ilinniagaqarsinnaapput inuiaqatigiinnut tamanut nukittorsaataasumik.
Ilinniarluarsimanersunik sulisinnaasoqalernissamut aqqut suli atualinnginnermi meeqqallu atuarfianni aallartittarpoq. Pingaarnerpaatulli meeqqat atuarfiat nukittorsassavarput, meerartagut nunani assersuuffigerusuttakkatsinni meeqqat piginnaasaasa assinginik pigisaqaleqqullugit.
Ullumikkummi suliffissat tamangajammik arlaatigut ilinniagaqarnissamik piumasaqaateqarfiupput. Taamaammat piginnaasanik tunngaviulluinnartunik pigisaqarnissaat pingaaruteqarneruleriartuinnarpoq. Piginnaasat meeqqat atuarfianni ilinniareersimasariaqartut. Ajoraluartumillu ullumikkut amerlavallaartut meeqqat atuarfiat qimattarpaat pisariaqartunik piginnaasaqaratik, tamannalu inuusuttut akornanni annertuallaartumik suliffissaaleqisoqarneratigut toqqaannartumik takuneqarsinnaavoq. Ajornartorsiut annertuupilussuuvoq iliuuseqarfigisariaqagarput.
Matumanilu piviusorsiortuunissarput immikkut pingaaruteqarpoq. Meeqqat atuarfiannik nunarsuarmi pitsaanersaasumik teori atorlugu pappiaratiguinnarlu pilersitsiniarneq iluaqutaanavianngilaq. Pissusiviusut malinnaatinneqartariaqarput. Piviusorsiortunik anguniagaqartariaqarpugut pisuussutit pigisagut najoqqutaralugit. Demokraatit isumaqarput atuartitsissutigineqartartut matematik, kalaallisut, dansk, tuluttut aamma inuiaqatigiilerineq ukkatarineqarnerusariaqartut, atuartitsissutit taakku ilinniartitaanikkut ingerlaqqinnissamut suliffeqalersinnaanissamullu pingaaruteqarmata. Tassungalu atatillugu pingaaruteqarpoq meeqqat atuarfianni atuartut tamarmik meeqqat atuarfiata kingorna qanoq pisoqarnissaanut atuarfik angajoqqaallu suleqatigalugit ersarissumik pilersaarusiortarnissaat eqqumaffiginerussallugu. Meeqqat pilersaaruteqanngitsut amerlavallaarput, taamaattumillu aamma meeqqat atuarfianni soraarummeernerup kingorna allamik ilinniagaqaratik.
Tamatuma saniatigut isertugaataanngilaq uagut isumaqaratta meeqqat inooqataanikkut ajornartorsiortut maluginiarnissaat paasinissaallu atuarfiit pikkoriffiginerusariaqaraat, meeqqat taakku piffissaagallartillugu eqqortumik ikiorserneqarniassammata.
Pingaarnerpaarli tassaagunarpoq meeqqat atuarfiannik meeqqat atugaannik pingaartitsiffiusumik pilersitsinissaq. Atugarissaartummi ilinniarluarsinnaanerusarput. Tassungalu atatillugu ukkatarineqarnerusariaqartut ilagaat ilinniarnermut atatillugu timip aalatinnissaata silaannarissarnerusarnissallu ukkatarineqarnerunissaat. Atuarfiit tamanna pillugu nutaaliornerusinnaasariaqarput. Timimik aalatitsineruneq atukkanut peqqissutsimullu iluaqutaassapput, meeqqallu inuusuttullu nukittunerulersinneqassapput.
Suli atulersimanngitsunut suliaqarfik Demokraatit aamma uummateqarfigilluinnarpaat. Ulluunerani paaqqinnittarfik tassaaginnassanngilaq meeqqanik paarsiffiusoq – aamma tassaasariaqarpoq meerartatta pinnguarnikkut ineriartorfigisinnaasaat taamaalillutillu meeqqat atuarfianni aallartinnissaminnut piareersarfigisinnaasaat. Tamannalu perorsaanikkut suliassaavoq annertooq. Perorsaasut pitsaanerusunik atugaqalernissaat Demokraatit qinigaaffimmi qaangiuttumi siuttuuffigaat, suliarlu taanna 2020-p naalernerani iluatsippoq perorsaasut suliaqaqatigiinnut allanut sanilliullugit akissarsiatigut annertuumik qaffaavigineqarmata. Tamanna nuannaarutigeqaarput, ulluuneranilu paaqqinnittarfinnik pitsaanerusunik toqqissisimanarnerusunillu pilersitsinissamut alloriarnertut siullertut isigaarput. Sulilu atualersimanngitsunut suliaqarfik qinigaaffimmi aggersumi ukkatarineruniarparput. Perorsaasut akissarsiaat pitsaanerulerput. Maannalu sulinermi atukkat pitsanngorsarnissaat ulluuneranilu paaqqinnittarfinni sinaakkutissat pitsanngorsarnissaat ilungersorluta sulissutiginiarpagut, perorsaasut suliatigut pikkorissusertik meeqqanut taakkulu ineriartortinnissaannut atorsinnaaniassammatigit
Ima iliorniarpugut
– Atuarfinni allatsinik atuarfinni aqutsisoqatigiinnut allaffissornikkut oqilisaassisinnaasunik ilinniartitsillutalu atorfinitsitsissaagut.
– Atuarfinni tamani inunnik isumalluutigineqarsinnaasunik atorfinitsitsissaagut, taakkulu meeqqat inooqataanikkut unammilligassaqartut paasiniaanissaannut, suussusiliinissamut ikiuinissamullu suleqataassapput.
– Meeqqanut austismeqartunut ukioqatigiit akimorlugit immikkut atuartitsinermut klassinik pilersitsissaagut, meeqqat taama ittunik unammilligassaqartut ilinniarnissaminnut sinaakkutinik allanik pisariaqartitsimmata.
– Atuartut atuagarsornikkut sanngiinnerusut, atuagarsornikkullu nukittunerusut namminneq qaffasissutsiminni atuartinneqartarnissaannut sulisussaqarnissaa isumagissavarput, atuartut ataasiakkaat imminnut naleqquttumik siunnerfilimmillu piginnaanngorsarsinnaanissaat angujumallugu.
– Meeqqat ineriartornissaat pinnguarnerlu aqqutigalugu ilinniartinnissaat ukkatarinerujumallugu ulluunerani paaqqinnittarfinni sinaakkusersuisoqassaaq.
– Perorsaasut kiisami pissusissamisoorluinnartumillu akissarsiaqarnerulerput, suliassaqarfiulli ukkatariinnarnissaa pingaaruteqarpoq. Qinigaaffimmi nutaami qaammatini siullerni arfinilinni suliaq aallartisarneqartussaavoq ulluunerani paaqqinnittarfinni sulinermi atukkat sulisunullu atugassarititaasut pitsanngorsarnissaannut iliuusissatut pilersaarummik kinguneqartussamik.
– Ilulissani GUX pilersinneqassaaq
– Meeqqat atuarfianni atuartut ilinniartitaanikkut ingerlaqqinnissaannut ataqatigiissumik pilersaarusiortoqarnissaa qulakkeerneqassaaq, meeqqat atuarfiata atuartullu ataasiakkaat angajoqqaavisalu meeqqat atuarfiata kingorna meeqqat ingerlariaqqinnissaannut pilersaarusiornissaq akisussaaffigissallugu. Tamanna assersuutigalugu atuarfimmut isumaqatigiissusiornikkut pisinnaavoq.
– Atuarfiup siulersuisuini sulinerup qanoq naleqartigineranik ersarissaasoqassaaq, suleqataanissaq angajoqqaanut pilerinarnerulersillugu taamaaliornikkullu atuarfiit ataasiakkaat kiffaanngissuseqarnissaat qulakkeerinneqataaffigalugulu meeqqanut avatangiisinik pingaarutilinnik pilersitseqataallutik.